Pro la vizito de buspleno da esperantistpoj el TIENEN (Belgio), kiuj malkovris la elzasajn produktojn (fromaĝojn kaj Esperanto-vinojn), ni proponas al vi klarigi la fabrikadon de la mondfama fromaĝo de Munster.

Famis ĝis nun la fromaĝo de Munster, kies tradicia fabrikad-metodon ni deziras klarigi al vi. Sciu, ke ĝi estas inventita je la X-a aŭ XI-a jarcento de la monakoj, kiuj setliĝis en la valo. Kaj vi ja scias, ke ili ne neglektis la bongustajn nutraĵojn !

La famkonata fromaĝo de Munster

La fromaĝo de Munster estas molpasta fromaĝo fabrikata el bovino-lakto. La laŭfarma fabrikado, nurnure el kruda lakto, okazas en la loko de la laktoproduktado. La lakto de la vespera melkado estas malvarmigata ĝis 12° kaj matene revarmigata al 32°. Aldonatas sekvonttage la lakto de la matena melkado, parte elkremigita kaj same revarmigita al 32°. Poste oni aldonas al la tuto kazeigilon.

Post unu horo okazas la disigo inter la selakto, kiun oni forprenas kaj la kazeo, kiun oni metas en muldilon, kiam ĝi havas certan konsiston. En tiuj muldiloj ĝi elgutiĝos.
La unuan tagon tiu naskiĝanta fromaĝo estas renversigata kvarfoje, la duan tagon ĝi estas salumata, kaj poste viŝata dum du aŭ tri tagoj.
Poste oni ĝin lokas en la kelo, kie necesas ĝin lavi dum du ĝis tri semajnoj. La fromaĝo de Munster estas ĝenerale frandata post kiam ĝi atingis certan gradon da maturiĝo. Sed la ĝuado dependas de la persona gusto. Iuj ĝin ŝatas "ĝiskore" finmaturita, aliaj nur parte.
Ni konsilas al vi ĝin frandi kun glaso da Geŭurztraminer.

La tielnomata "Siesskas" : sukerumita fromaĝo.

La "Siesskas" estas tre ŝatata specialaĵo. La kunkrema lakto estas kazeigata je la temperaturo postmelka. Poste ĝi estas disigata de la selakto kaj enmuldigita. Post duonhoro da ripozado, ĝi estas preta por konsumado kun sukero, kremo kaj ĉerizo-brando (Kirsch).
Tiu "Siesskas" estas plejofte la deserto de la melkista menuo : "Menu du marcaire".
Supo
Viando-torto de la valo de Munster kun verda salato
Fumaĵita porkoskapolo kun "Roïgabrageldi" (en kaldrono kun multe da graso kuiritaj terpomoj) Siesskas
Ĉio kun elzasa vino kaj ...posta dormeto !!!

La montar-fromaĝo "Barikas"

Tiu fromaĝo estas el premita pasto.
La lakto de la vespero kaj de la posta mateno estas varmigata ĝis 32°, kazeigata kaj disigata de la selakto. Poste la kazeigita lakto estas revarmigata je unu grado ĉiuminute kaj premata dum unu tagnokto ; poste ĝi estos elmuldigata kaj restigata en salakvo dum plia tagnokto.
Post ĝi estos viŝata kaj lokata en kelo. La maturiĝo daŭros inter tri kaj ses monatoj kaj dume ĝi estos lavata dufoje ĉiusemajne.
Jen la fromaĝo, kiun vi povas frandi okaze de paŭzo dum enmontara migrado. Ĝi ja eltenas plurtagan migradon en dorsosako.
Tiujn fromaĝojn kaj la melkistan menuon vi povas frandi en ĉiuj farmgastejoj (fermes-auberges) laŭlonge de la "strato de la fromaĝo".

TAKE - LA DOMO